ស្វាយរៀង៖ ជើងមាន់ខូចគុណភាពចំនួនជាង ១០០តោនដឹកតាមរថយន្តកុងតឺន័រចំនួន៤ ដែលឈ្មួញលួចនាំចូលពីប្រទេសវៀតណាមដោយគ្មានច្បាប់ត្រឹមត្រូវ ត្រូវបានអាជ្ញាធរខេត្តស្វាយរៀងដុតបំផ្លាញចោលកាលពីថ្ងៃទី០៤ ខែកុម្ភៈ ឆ្នាំ២០២៤ នៅក្នុងភូមិចុងព្រែក សង្កាត់ស្វាយរៀង ក្រុងស្វាយរៀង។

អភិបាលខេត្ដស្វាយរៀង លោក ប៉េង ពោធិ៍សាល បានបញ្ជាក់ថា ទំនិញទាំងអស់នេះ ត្រូវបានក្រុមហ៊ុន SBL ដែលមានទីតាំងនៅក្រុងបាវិត នាំចូលពីប្រទេសវៀតណាម ហើយក្រុមហ៊ុនបានផ្ទេរទូកុងតឺន័រដឹកទៅច្រកដូង នៅស្រុករមាសហែក រួចនាំចេញចូលទៅវៀតណាមវិញ។

ទំនិញទាំងអស់នេះត្រូវបានមន្ត្រីសាខាគយរដ្ឋាករ ខេត្តស្វាយរៀង សហការជាមួយកម្លាំងកងរាជអាវុធហត្ថ ឃាត់កុងទីន័រចំនួន ៤គ្រឿងដើម្បីត្រួតពិនិត្យ។ ក្រោយត្រួតពិនិត្យ ក្នុងរថយន្តកុងតឺន័រទាំង ៤គ្រឿងនេះ គឺផ្ទុកជើងមាន់ ខូចគុណភាពដែលនាំឱ្យប៉ះពាល់សុខភាពអ្នកប្រើប្រាស់៕